ਹੈਰਾਨ ਹਾਂ !

ਹੈਰਾਨ ਹਾਂ !

ਪਤਝੜ ਦੇ ਪੱਤੇ
ਤੇਰੇ ਪੈਰਾਂ ਹੇਠ ਆ ਕੇ
ਸੰਗੀਤ ਪੈਦਾ ਕਰਨ ਲਈ
ਬੇਕਰਾਰ ਹਨ

ਠੰਡੀ ਪੌਣ ਤੇਰੇ ਨਾਲ
ਮਟਕ ਮਟਕ ਤੁਰਨਾ
ਚਾਹੁੰਦੀ ਹੈ

ਗੁਲਾਬ ਦਾ ਫੁੱਲ
ਇਸ ਆਸ ਤੇ ਖਿੜ ਰਿਹਾ ਹੈ
ਕਿ ਇੱਕ ਦਿਨ ਤੇਰੇ ਵਾਲਾਂ ਦਾ ਸ਼ਿਗਾਰ ਬਣੇਗਾ

ਤੇ

ਮੇਰਾ ਦਿਲ
ਇਸ ਆਸ ਤੇ ਧੜਕ ਰਿਹਾ
ਕਿ ਇੱਕ ਦਿਨ
ਤੇਰੇ ਦਿਲ ਨਾਲ ਧੜਕੇਗਾ

ਕੋਸ਼ਿਸ਼

ਆ ਮਿਲਕੇ ਕੋਈ
ਅਜਿਹਾ ਗੀਤ ਗਾਈਏ

ਜੋ ਛੱਡ ਚੁੱਕੇ ਹਨ
ਹੋਸਲਾ ਉੱਡਣ ਦਾ
ਉਨ੍ਹਾਂ ਦੇ ਪਰਾਂ 'ਚ' ਜਾਨ ਪਾਈਏ

ਠਰ ਚੁੱਕੇ ਘਰਾਂ ਨੂੰ
ਨਿੱਘ ਦਾ ਅਹਿਸਾਸ ਕਰਵਾਈਏ

ਥੱਕ ਚੁੱਕੀਆਂ ਰੂਹਾਂ ਨੂੰ
ਬਲਦੀ ਲਾਟ ਬਣਾਈਏ

ਉਸ ਟੁੱਟਦੇ ਤਾਰੇ ਨੂੰ
ਡੁਬਣੋਂ ਬਚਾਈਏ

ਆ ਮਿਲਕੇ ਕੋਈ
ਅਜਿਹਾ ਗੀਤ ਗਾਈਏ

ਆ ਮਿਲਕੇ ਕੋਈ
ਅਜਿਹਾ ਗੀਤ ਗਾਈਏ